Masa më të rrepta për armëmbajtje në Serbi

Serbia ka miratuar masa të rrepta që kërkojnë nga Ministria e Punëve të Brendshme që urgjentisht të përgatisë amendamente për Ligjin për armët dhe municionin, shkruan Radio Evropa e Lirë.

Në njoftimin e Qeverisë serbe u tha se do të ashpërsojnë kritere për posedimin e armëve të shkurta të zjarrit dhe ata që nuk plotësojnë këto kritere strikte, parashikohet blerja e detyrueshme e armëve.

“Këto masa po miratohen për të ulur për 90 për qind numrin e armëve të shkurtra që janë në posedim të personave juridikë dhe fizikë”, u tha në njoftim, përcjellë albinfo.ch.

Amendamentet e reja në ligj do të mundësojnë edhe kontrollet e detyrueshme të qytetarëve që kanë të drejtë të posedojnë armë, përfshirë edhe armë për gjueti. Në kontrolle do të përfshihen kontrollet mjekësore, psikiatrike dhe psikologjike, por edhe teste të detyrueshme për substanca psikoaktive. Këto kontrolle do të bëhen çdo gjashtë muaj apo një vit, shkruan REL.

Ministria e Punëve të Brendshme po ashtu do të shqyrtojë edhe ashpërsimin e kritereve për posedimin e armëve të gjuetisë.

Këto ndryshime të reja në ligj vijnë pas dy vrasjeve që ndodhën në javën që po lëmë pas kur një fëmijë 14 vjeçar në një shkollë në Beograd vrau 8 fëmijë dhe rojën e shkollës dhe dy ditë pas një 21 vjeçar vrau nëntë persona në një fshat në afërsi të Beogradit.