Aktakuzë për vrasjen e trefishtë në Gllogjan

Prokuroria Themelore e Pejës ka ngritur aktakuzë ndaj tre personave për vrasjen e trefishtë në Gllogjan, ku mbetën të vdekur dy fëmijë dhe shoferi i autobusit.

Kastriot dhe Kreshnik Mehmetaj akuzohen për veprën penale vrasje e rëndë, ndërkohë që Halil Mehmetaj për veprën shtytje në vrasje.

Prokurorja e rastit, Sahide Gashi, po ashtu njoftoi se Malësor Mehmetaj është liruar nga akuza.

“Prokuroria për të pandehurin Malsor Mehmetaj nuk ka arritur të vërtetojë dyshimin se i njëjti ka qenë i përfshirë në ndonjë mënyrë në krim, andaj Prokuroria ka marrë vendim që kundër tij t’i pushojë hetimet”, përcjell albinfo.ch.

Tutje prokurorja ka bërë të ditur se është zbuluar edhe motivi, por që nuk e ka ndarë me mediat. “Fakti që sot është ngritur aktakuza, kemi gjetur prova të shumta që i lidhin personat në fjalë me veprën. Kemi zbuluar motivin në organizimin dhe planifikimin e vrasjes”, përcjell albinfo.ch.

Prokurorja po ashtu ka bërë të ditur se Prokuroria ka arritur të sigurojë prova të mjaftueshme që i lidhin personat në fjalë me planifikimin dhe organizimin e vrasjes.