Serbia shkel Marrëveshjen për normalizim

Takimi Oher

Serbia ka shkelur Marrëveshjen e Brukselit dhe të Ohrit për normalizim të marrëdhënieve me Kosovën, duke kërcënuar shtetet që përkrahin anëtarësimin e Kosovës në Këshill të Evropës, shkruan koha.net.

Neni katër i Marrëveshjes bazë thotë se “Serbia nuk do ta kundërshtojë anëtarësimin e Kosovës në asnjë organizatë ndërkombëtare”, përcjell albinfinfo.ch.

Ministri i Punëve të Jashtme i Serbisë, Ivica Daçiq, ka kërcënuar Malin e Zi, pasi përfaqësuesi i këtij shteti në KE ka votuar pro aplikimit për anëtarësimit të Kosovës.

“Mali i Zi ka mundur të paktën të përmbahej. Duhet të veprojmë me reciprocitet. Mali i Zi ka votuar për pranimin e Kosovës. Edhe atyre do t’u duhet ndonjëherë vota jonë, në të cilën sigurisht që s’mund të llogarisin”, ka thënë Daçiqi të martën për RTS-në, raporton “N1”, përcjell albinfo.ch.

Daçiqi ka shprehur befasinë e tij për votën abstenuese të Ukrainës. Sa i përket abstenimit të Bosnjës, ka kaluar te çështja e “integritetit territorial”. Për të befasuese kanë qenë edhe abstenimet e Greqisë dhe Sllovakisë.

Ministri i Jashtëm serb ka falënderuar Qipron, Spanjën, Rumaninë, Azerbajxhanin dhe Gjeorgjinë, e po ashtu edhe Hungarinë, që si shtet njohës, votoi kundër aplikimit të Kosovës në Këshill të Evropës, shkruan koha.net.

Tutje ai ka deklaruar se përderisa nuk ka asociacion, asnjë pikë e Marrëveshjes së Ohrit nuk është valide.

Pas votës kundër të Serbisë, të hënën në mbrëmje presidentja e Kosovës, Vjosa Osmani, shkroi në Twitter se Serbia ka shkelur Marrëveshjen e Brukselit me lobimin dhe votën e saj kundër pranimit të aplikimit të Kosovës për anëtarësim në KE, përcjell albinfo.ch.