Hill: Kosova të themelojë Asociacionin

Ambasadori amerikan në Serbi, Christopher Hill, të martën në Beograd u shpreh se ka ardhur koha për të formuar Asociacionin e komunave me shumicë serbe në Kosovë.

“E kuptoj pse m’u drejtuat me atë pyetje, sepse edhe unë e bëj të njëjtën. Këtë javë bëhen 10 vjet prej nënshkrimit të Marrëveshjes së Brukselit, dhe është koha që të formohet Asociacioni. Ajo se çfarë mund t’ju garantoj është që nuk do të dorëzohemi derisa të ndodhë”, u ka thënë Hill gazetarëve, raporton Radio Evropa e Lirë.

Sipas tij, serbët duhet të kenë besim në marrëveshjet e arritura në Bruksel.

“Një tjetër arsye, ndoshta edhe më e rëndësishmja, është që këto komunitete në Kosovë duhet ta dinë se çfarë e ardhme i pret, sepse ato nuk janë formuar dje, ato kanë qenë në Kosovë për vite. Dua vërtet t’ju siguroj që do ta trajtojmë këtë obligim me seriozitetin më të madh”, ka thënë ai.

Kosova e Serbia kanë arritur marrëveshje fillimisht në vitin 2013 për themelimin e Asociacionit të Komunave me shumicë serbe, marrëveshje e cila është detajizuar në 2015-ën.

Megjithatë, Gjykata Kushtetuese e Kosovës i ka hedhur poshtë disa nene të kësaj marrëvesheje, përcjell albinfo.ch.

Kosova e Serbia më 18 mars 2023 në Ohër po ashtu kanë arritur një marrëveshje për normalizim të marrëdhënieve dhe në aneksin e saj të dakorduar me ndërmjetësim të Bashkimit Evropian, një prej pikave urgjente është zbatimi i marrëveshjes për themelimin e Asociacionit të komunave me shumicë serbe.