Arrestohet një i dyshuar për djegien e veturave në veri

Është arrestuar një qytetarë serb si i dyshuar për djegien e veturave në këtë pjesë të vendit. Këtë e ka bërë të ditur ministri i Punëve të Brendshme, Xhelal Sveçla. “Njëri nga ta sot është arrestuar dhe i cili përveç që ka qenë i përfshirë në djegien e veturave në veri, si pjesë aktive e strukturës kriminale të të ashtuquajturës “Mbrojtje Civile”, më parë ai kishte sulmuar me armë Policinë e Kosovës, duke i plagosur dy zyrtarë të saj”, ka shkruar ai, përcjell albinfo.ch.

I njëjti akuzohet për “Pjesëmarrje ose organizim të grupit kriminal të organizuar”, “Vrasje në tentativë”, “Shkaktim i rrezikut të përgjithshëm” dhe “Sulm ndaj personit zyrtar gjatë kryerjes së detyrës zyrtare”.

Tutje, ministri i Brendshëm thotë se i gjithë skenari i djegies së veturave është i orkestruar nga Beogradi. “Djegia e veturave të qytetarëve tanë në veri e orkestruar nga Beogradi me qëllim të shkaktimit të frikës tek qytetarët tjerë është pa dyshim akt i rëndë kriminal. Siç edhe kemi thënë, sa herë kanë ndodhur akte të tilla, njësitet relevante policore kanë qenë të angazhuara në identifikimin e kriminelëve që kanë kryer akte të tilla”, përcjell albinfo.ch.

Për tre ditë me radhë në Zubin Potok, Zveçan e Leposaviq janë djegur tetë vetura të qytetarëve të nacionalitetit serb. Kjo është konsideruar si kërcënim për mospjesëmarrje në zgjedhjet lokale të 23 prillit në katër komunat veriore të Kosovës.