Ozil ndërpren kontratën me Basaksehir, raportohet se i ka dhënë fund karrierës

Mesut Ozil duket se i ka dhënë fund karrierës së tij si futbollist, kështu së paku kanë njoftuar mediat e ndryshme turke.

Mesfushori gjerman në verën e vitit të kaluar vendosi të largohet nga Fenerbahce për t’iu bashkuar skuadrës tjetër nga Stambolli, Basaksehir.

Por gazetari turk, Yakup Cinar, nga gazeta Fanatik, ka raportuar se Ozil ka ndërprerë kontratën me klubin e tij aktual.

Gjithnjë sipas Cinar, Ozil u ka thënë bashkëlojtarëve të tij dhe drejtuesve të klubit se ka vendosur t’i japë fund karrierës së tij në moshën 34-vjeçare.

Deri më tani Ozil nuk ka pasur asnjë deklaratë apo ndonjë postim në rrjetet sociale, por një gjë të tillë ai pritet ta bëjë gjatë ditëve të ardhshme.

Ozil e ka nisur karrierën në shtetin ku lindi në Gjermani te skuadra e Schalke 04, para se të luante edhe për Werderin në Bundesliga.

Ndërkohë iu bashkua Real Madridit në vitin 2010 dhe pastaj Arsenalit më 2013, ku qëndroi për tetë vjet.

34-vjeçari gjatë karrierës së tij ka fituar një titull kampioni me Realin, një Kupë dhe një Superkupë të Spanjës.