Sindikatat zvicerane: Pagat më të ulëta duhet të jenë të paktën 4500 franga

Kërkohet që të paktën 5000 franga të jetë paga mujore për të kualifikuarit ndërsa për punëtorët e pakualifikuar të paktën 4500 franga

Federata Zvicerane e Sindikatave (SGB) paralajmëron se hendeku i pagave në Zvicër po rritet, transmeton albinfo.ch. SGB ka njoftuar në konferencën e saj vjetore për media se diferencat në paga janë rritur.

Sipas raportit të shpërndarjes të publikuar të hënën nga SGB, punëtorët me paga të ulëta dhe të mesme tani marrin më pak paga në terma realë se në vitin 2016.

Vetëm dhjetë përqindëshit në krye të listës i janë rritur pagat realisht. Prandaj ofensiva e pagave është e nevojshme, është shprehur kryeekonomisti i SGB, Daniel Lampart.

Në vitin 2023, sindikatat do të fokusohen në zhvillimin e pagave. Ajo që kërkohet është rritja reale e pagave, një rregullim automatik i kostos së jetesës dhe të paktën 5000 franga paga mujore për njerëzit e punësuar që kanë një stazh, përcjell albinfo.ch. Punëtorët e pakualifikuar duhet të marrin të paktën 4500 franga, sipas sindikatave të Zvicrës.

Roli i sindikatave është shumë i rëndësishëm, është shprehur të hënën për mediat në Bernë Pierre-Yves Maillard, kryetar i Konfederatës së Sindikatave Zvicerane (SGB), përcjell albinfo.ch. Kjo u dëshmua së fundmi në rastin e rritjes së çmimeve. Është ende herët për të bërë një bilanc sa i përket zhvillimeve të pagave. Aty ku sindikatat kanë negociuar, megjithatë, rritjet janë afër inflacionit.

 

---