1 muaj paraburgim për serbin që dyshohet se kreu krime lufte në Kosovë

Gjykata Themelore në Prishtinë ka bërë të ditur se është caktuar masa e paraburgimit prej 1 muaji kundër Sllogjan Trajkoviq, për veprën penale “Krime lufte kundër popullatës civile”.

“I pandehuri S.T. dyshohet se ka kryer veprat penale Krime lufte kundër popullatës civile nga neni 142 lidhur me nenin 22 të LP të RSFJ-së të paraparë edhe me Kodin Penal të Republikës së Kosovës, Krime të luftës në shkelje të rëndë të konventave të Gjenevës neni 144 të KPRK-së, Krimet e luftës në shkelje të rëndë të nenit 3 të përbashkët për katër konventat e Gjenevës nga neni 145 dhe 146 te KPRK-së dhe Organizimi i grupeve për kryerjen e gjenocidit, krimeve kundër njerëzimit dhe krimeve të luftës, neni 154, ndërlidhur me nenin 31 të Kodit Penal të Republikës se Kosovës”, është bërë e ditur në komunikatë.

Prokuroria Speciale e Kosovës njoftoi se Sllogjan Trajkoviq, së bashku edhe me persona të tjerë të uniformuar ka marrë pjesë në ofensivën ushtarake të datës 06.04.1999, në fshatin Reznik, komuna e Vushtrrisë, dhe në ofensivën e datës 02.05.1999, në qytetin e Vushtrrisë.