Rusia zgjeron arsenalin bërthamor

Rusia po zgjeron dhe modernizon arsenalin e saj bërthamor, deklaroi dje ministri i Mbrojtjes i SHBA-së, Lloyd Austin, në një kohë kur presidenti rus, Vladimir Putin, i përballur me pengesa në Ukrainë, ka sugjeruar vazhdimisht se mund të përdorë armë bërthamore, sipas NBC News.

Rusia ka stokun më të madh të armëve bërthamore në botë, me afro 6000 koka luftarake, sipas ekspertëve.

Së bashku, Rusia dhe SHBA-ja mbajnë rreth 90% të kokave bërthamore në botë, të mjaftueshme për të shkatërruar planetin.

“Rusia po modernizon dhe zgjeron gjithashtu arsenalin e saj bërthamor”, tha Austin në një ceremoni të Komandës Strategjike të SHBA-së, e cila mbikëqyr arsenalin bërthamor të Shteteve të Bashkuara të Amerikës.

“Ndërsa Kremlini vazhdon luftën e tij mizore dhe të paprovokuar kundër Ukrainës, e gjithë bota e ka parë Putinin të përfshihet në një goditje thellësisht të papërgjegjshme bërthamore”, tha Austin.

Rusia ka thënë se do t’i kushtojë vëmendje të veçantë ndërtimit të infrastrukturës për forcat e saj bërthamore në vitin 2023.

Më herët, Putini u zotua në një konferencë shtypi se çdo vend që guxonte të sulmonte Rusinë me armë bërthamore do të fshihej nga faqja e dheut.

Putini tha se Rusia nuk kishte urdhër për të nisur një sulm parandalues bërthamor, por armët e avancuara hipersonike ruse do të siguronin që Rusia të mund të përgjigjej me forcë nëse do të sulmohej.

Putin, më 21 shtator, paralajmëroi Perëndimin se nuk po bënte një deklaratë të rreme, kur tha se ishte gati të përdorte armë bërthamore për të mbrojtur Rusinë.

Më 30 shtator, ai tha se SHBA-ja kishte krijuar një precedent duke hedhur dy bomba atomike në Japoni, në vitin 1945. Zyrtarët rusë thonë se Perëndimi i ka keqinterpretuar vazhdimisht deklaratat e Kremlinit.

SHBA-ja ka paralajmëruar Rusinë për pasojat e përdorimit të armëve bërthamore.

Rusia dhe Shtetet e Bashkuara të Amerikës kishin planifikuar të zhvillonin bisedime në javët e fundit mbi traktatin ekzistues të tyre “New Start”, i cili kufizon numrin e kokave bërthamore që secili nga vendet mund të vendosë.

Por, Moska u tërhoq në prag të takimit, duke akuzuar SHBA-në për sjellje toksike anti-ruse dhe se po përpiqej të manipulonte traktatin në avantazhin e saj.

 

---