Industria evropiane e metaleve, në rrezik nga kriza globale

(KEYSTONE/Salvatore Di Nolfi)

Kriza aktuale e energjisë dhe ndërprerja e furnizimeve ruse të karburanteve fosile po rrezikojnë sektorin industrial të Evropës dhe madje mund të çojnë në deindustrializim, tha organizmi i njohur konsulent i biznesit PWC në një studim.

Evropa po humb konkurrencën dhe atraktivitetin e saj si një vend prodhimi me industrinë në Gjermani, fuqinë ekonomike të kontinentit, që është goditur veçanërisht rëndë nga rritja e mprehtë e kostos së gazit natyror.

“Shumë kompani mund të vendosin në të ardhmen të ristrukturojnë prodhimin e tyre brenda Evropës”, tha Andreas Spane, kreu i degës së ”PwC Strategy” dhe që përpiloi studimin.

”Sektorët e metaleve, kimikateve dhe automobilave janë nën presion të jashtëzakonshëm në Gjermani, ndërsa çmimet po rriten në mënyrë më të moderuar në Francë dhe Spanjë, kryesisht si rezultat i energjisë së prodhuar nga energjia bërthamore ose nga burimet e rinovueshme”, zbuloi studimi.

”Vendet shumë të varura nga furnizimet ruse të karburanteve fosile, si Polonia, janë nën presion ekstrem”, tha ai, transmeton dpa, përcjell albinfo.ch.

Ndërsa industria gjermane po prodhon me kosto më të ulët se mesatarja e BE-së, kompanitë në sektorët më të prekur mund ta zhvendosnin prodhimin jashtë bllokut.

Kjo mund të çojë në ndryshime strukturore në peizazhin industrial të BE-së apo edhe në deindustrializim.

Studimi parashikoi se kushtet e tregut të energjisë do të lehtësoheshin vetëm në vitin 2024.

Ai vuri në dukje se kishte mundësi biznesi në zgjerimin e energjisë së rinovueshme dhe dekarbonizimin e prodhimit.