Nxënësja shqiptare shpallet më e mira në Itali

Rahela Pashaj ditën e djeshme është vlerësuar nga Presidenti italian me çmimin “Alfiere del Lavoro”

Me origjinë nga Durrësi, banuese në Taranto, Rahela Pashaj ditën e djeshme është vlerësuar nga Presidenti italian me çmimin “Alfiere del Lavoro”.

Në ceremoninë e mbajtur dje në pallatin Quirinale Sergio Mattarella, ka vlerësuar 25 nxënësit ekselentë në Itali, mes tyre tre nga rajoni i Pulias: Giacomo Calogero (student nga Taurisano), Rahela Pashaj (nga Taranto) dhe Giuseppe Scialpi (nga Martina) të përzgjedhur nga 3181 aplikimet e paraqitura nga drejtues shkollash nga e gjithë Italia.

Rahela Pashaj verën e kaluar u diplomua në shkollën e mesme “Galileo Ferraris” në Taranto me rezultate të shkëlqyera, ndërsa aktualisht është studente në universitetin “Bocconi” në kursin “Ekonomi dhe Financa Ndërkombëtare”.

Çmimi “Alfieri del Lavoro” u krijua në vitin 1961, me rastin e njëqindvjetorit të Bashkimit të Italisë dhe vitin e kaluar festoi 60-vjetorin e tij. Nga viti 1961 deri në vitin 2022 janë akorduar 1,558 çmime “Alfieri del Lavoro”./diasporashqiptare.al

---