Këshilli Evropian: Në rend dite çështja e liberalizimit të vizave për Kosovën

Frederic Köberl @internetztube

Sot, grupi punues i Këshillit Evropian është duke mbajtur takimin, ku në rend dite do të jetë edhe çështja e liberalizimit të vizave për Kosovën. Në Këshill do të nisë diskutimi për të parë se a ka mbështetje nga shtetet anëtare dhe se a mund të lëvizet përpara, përcjell albinfo.ch.

Diskutimi për liberalizimin e vizave në këtë takim do të nisë rreth orës 14:00-14:30, dhe se i njëjti do të jetë i mbyllur.

Komisioni Evropian ditë më parë u ka dërguar vendeve anëtare të Bashkimit Evropian një dokument, ku rithekson se Kosova i ka përmbushur të gjitha kriteret për liberalizimin e vizave.

Por cilat janë hapat që duhet ndjekur në rast se sot ka lajm pozitiv për liberalizmin e vizave. Eksperti i kësaj fushe, Taulant Kryeziu, ka shpjeguar procedurat që duhet ndjekur institucionet e Bashkimit Evropian deri te vendimi final që shtetasit e Kosovës të mund të udhëtojnë lirshëm në zonën Shengen.

Shpjegimi i procedurave nga Kryeziu:

1. Këshilli: Miratimi i pozicionit negociues në Këshill
2. KE/PE/KBE/: Pajtim në mes të Këshillit dhe PE-së, Trialogue (Trialogjet janë takime joformale trepalëshe për propozimet legjislative midis përfaqësuesve të Parlamentit, Këshillit dhe Komisionit. Qëllimi i tyre është të arrijnë një marrëveshje të përkohshme për një tekst të pranueshëm për të dy, Këshillin dhe Parlamentin)
3. Parlamenti Evropian: Votimi në seancë plenare të Parlamentit Evropian (në lexim të parë me shumicë të thjeshtë, në lexim të dytë me shumicë absolute)
4. Këshilli: Miratimi nga Ambasadorët COREPER II
5. Këshilli: Miratimi nga Këshilli i Ministrave me shumicë te kualifikuar apo ajo që quhet shumicë e dyfishtë 55% të vendeve anëtare, që përfaqëson të paktën 65% të popullsisë së BE-së
6. Ceremonia e nënshkrimit
7. Publikimi në Gazetën Zyrtare të BE-së
8. Hyrja në fuqi