Morën 20 milionë franga për testet që nuk i bënë kurrë, hetohen mashtruesit

Një person nga Rapperswil-Jona është akuzuar për 36 teste të rreme, përfshirë edhe në kohën kur ndodhej jashtë vendit

Sipas një vlerësimi nga shoqata e sigurimeve shëndetësore Santésuisse, rreth 20 milionë franga dyshohet se janë vjedhur me teste korona të faturuara gabimisht, transmeton albinfo.ch. Në disa raste, testet janë faturuar madje disa herë, pa u kryer fare.

Kështu ka deklaruar zëdhënësi i Santésuisse, Matthias Müller, të martën në edicionin e mbrëmjes së kaluar të “Tagesschau” në televizionin gjermanishtfolës zviceran SRF.

Shoqata supozon se një për qind e të gjitha testeve janë faturuar gabimisht.

Hulumtimi i “Kassensturz” kishte raportuar për një rast të një personi nga Rapperswil-Jona (St. Gallen), i cili u akuzua për 36 teste të rreme të koronës. Përfshirë edhe në kohën kur ai ndodhej jashtë vendit.

Dhe, ky nuk është rast i izoluar: Zyra Federale e Shëndetit Publik (BAG) është në dijeni të mashtrimeve, përcjell albinfo.ch. Siç është shprehur zëdhënësi i BAG, Gregor Lüthy, në Tagesschau, autoriteti ka ngritur një ekip prej tre personash në janar 2022 për t’u marrë me testet që dyshohet se ishin ngarkuar gabimisht.

---