Këshilli i Evropës: Çështja e Kosovës është konfidenciale

Çështja e Kosovës nuk dihet nëse është në agjendën e Këshillit të Evropës. Zëdhënësi i Këshillit të Evropës, Daniel Holtgen, është shprehur se diskutimet e Komitetit të Ministrave janë konfidenciale.

“Në terma më të përgjithshëm, procedurat për t’u bërë anëtar i KE-së janë të përcaktuara në Statutin e KE-së (veçanërisht në nenet 4, 5 dhe 20) dhe në Rezolutën Statutore që përcakton rolin e Asamblesë Parlamentare të Këshillit të Evropës në proces. Ne dëshirojmë të tërheqim vëmendjen tuaj për faktin se diskutimet e Komitetit të Ministrave janë konfidenciale. Nuk kemi më shumë informacion në këtë fazë”, është shprehur Holtgen.

Ndërsa sot mediat serbe raportuan se çështja e anëtarësimit të Kosovës në Këshillin e Evropës është hequr nga rendi i ditës.

Kujtojmë se Kosova ka aplikuar për anëtarësim në Këshillin e Evropës më 12 maj të këtij viti, shkruajnë mediat kosovare, përcjell albinfo.ch.