Mandl i kërkon BE-së sqarim: Pse u quajt ‘lider i opozitës’ Albin Kurti

Eurodeputeti austriak, Lukas Mandl, i ka kërkuar sqarim Bashkimit Evropian pas një lëshimi të bërë në faqen e BE-së, e cila kryeministrit të Kosovës i referohet si ‘lider opozitar’, transmeton Albinfo.ch.

Mandl ka kërkuar sqarim nga krerët e Bashkimit Evropian(BE), duke përfshirë Përfaqësuesin e Lartë për Politikë të Jashtme, Josep Borrell, emisarin për dialog Kosovë – Serbi, Miroslav Lajçak dhe presidenten e Komisionit Evropian, Ursula von der Leyen.

Mandl ka shpërndarë postimin e gazetares austriake, Franziska Tschinderle, të cilës i është dukur e pabesueshme që Kurtit i janë referuar si “lider i opozitës”.

“Prisni pak. A e ka prezantuar BE-ja vërtet Albin Kurtin si ‘lider të opozitës’ në vend të kryeministrit?”, ka pyetur ajo në Twitter.

Ndërsa Mandl në Twitter ka pyetur: “A mund t’ ju kërkoj sqarime për këtë çështje që ka ngritur gazetarja Tschinderle? Faleminderit! Hvala! Thank you! Danke! Merci”.

Megjithatë BE menjëherë e ka përmirësuar këtë gabim.