FBI zbarkon në shtëpinë e Trumpit, marrin disa dokumente

Kontrolli thuhet se ka të bëjë me një hetim për mbajtjen e dokumenteve zyrtare nga Trump.

Ish-presidenti i Shteteve të Bashkuara, Donald Trump, bën me dije se shtëpia e tij në Florida është bastisur nga FBI-ja dhe se agjentët hapën një kasafortë.

Trump deklaron se shtëpia në Mar-a-Lago në Palm Beach u pushtua për disa orë nga një grup i madh agjentësh të FBI-së.

Mediat amerikane raportojnë se kontrolli lidhet me dokumentet që presidenti mund t’i ketë çuar në Mar-a-Lago pas largimit nga Shtëpia e Bardhë, transmeton Cnn, përcjell Albinfo.ch.

Avokatja e Trump, Christina Bobb, tha për mediat se disa dokumente ishin sekuestruar gjatë kontrollit.

Përshkallëzimi dramatik i kontrollit të zbatimit të ligjit ndaj Donald Trump vjen ndërsa ai përgatitet për një kandidim të tretë të mundshëm presidencial më 2024.

Ndërkohë që nuk mund të mungonte dhe reagimi i ish-presidentit Trump.

“Këto janë kohë të errëta për kombin tonë. Kam bashkëpunuar me të gjitha agjencitë përkatëse qeveritare dhe kështu që bastisja e paparalajmëruar në shtëpinë time nuk ishte e nevojshme apo e përshtatshme. Një sulm i tillë mund të ndodhë vetëm në vendet e shkatërruara, të botës së tretë. Mjerisht, Amerika tani është bërë një nga ato vende, të korruptuara në një nivel të paparë më parë”, u shpreh ish-presidenti.

 

 

---