Boris Johnson jep dorëheqje

Kryeministri i Mbretërisë së Bashkuar, Boris Johnson, njoftoi dorëheqjen e tij si lider i Partisë Konservatore këtë të enjte, duke deklaruar se populli britanik duhet të fillojë menjëherë procesin e zgjedhjes së një lideri të ri.

Johnson tregoi në fjalimin e tij të dorëheqjes se planifikon të qëndrojë në post derisa të zgjidhet një pasardhës.

Sipas CNN, kjo është ajo që do të ndodhte në rrethana normale: një kryeministër që ka dhënë dorëheqjen si kryetar partie, qëndron në detyrë si kryeministër i përkohshëm derisa të ketë një drejtues të ri partie.

Por, nuk është e qartë nëse Partia Konservatore do ta mbështesë këtë në rastin e Johnson, pasi 50 zyrtarë janë dorëhequr nga postet e tyre deri më tani.

Ja çfarë mund të ndodhë më pas

A shkakton dorëheqja e Johnson zgjedhje të përgjithshme?

Jo, pasi fillon procesi i Partisë Konservatore për zgjedhjen e një lideri të ri të partisë. Kryeministrat e Mbretërisë së Bashkuar nuk zgjidhen drejtpërdrejt nga populli, Johnson është kryeministër sepse është kreu i partisë më të madhe në Dhomën e Komunave. Konservatorët do të jenë ende partia më e madhe pas dorëheqjes së Johnson, kështu që kreu i ri i partisë do të bëhet kryeministër.

Si zgjidhet kreu i ri i Partisë Konservatore?

Kandidatët për udhëheqje kanë nevojë për mbështetjen e të paktën tetë ligjvënësve. Nëse ka më shumë se dy kandidatë, ligjvënësit e Partisë Konservatore mbajnë raund pas raundi votash për të ulur numrin e kandidatëve për udhëheqje në dy. Pastaj anëtarët e Partisë Konservatore votojnë në mbarë vendin, ndërsa fituesi bëhet kreu i partisë dhe kryeministër.

Kur Johnson largohet përfundimisht nga Downing Street, çfarë ndodh?

Ai ia dorëzon dorëheqjen Mbretëreshës, personalisht. Pallati do të njoftojë zyrtarisht se Mbretëresha Elizabeth II ka pranuar dorëheqjen e Johnson dhe do të thotë se kë ka ftuar të bëhet kryeministër për ta zëvendësuar atë. Ai person më pas do të shkojë të takojë Mbretëreshën për të pranuar ftesën.

A duhet kryeministri i ri të shpallë zgjedhje të përgjithshme?

Jo, pasi Mbretëria e Bashkuar nuk është planifikuar të ketë zgjedhje të tjera të përgjithshme deri në dhjetor 2024. Kryeministri i ri mund të zgjedhë t’i kërkojë Parlamentit të votojë për zgjedhje të parakohshme, por nuk i kërkohet ta bëjë këtë.