Zëdhënësi i NATO-s: Perëndimi e ka kuptuar gabimin, ka filluar të aktivizohet më shumë në Ballkan

Jamie Shea, i cili ishte zëdhënës i NATO-s gjatë bombardimit të makinesirë serbe për parandalimin e masakrave në Kosovë, ka folur rreth agresionit rus në Ukrainë dhe ndikimit të saj në rajonin tonë.

Shea së fundi ka dhënë një intervistë për mediumin kroat, index.hr, ku ka ka pohuar se Bashkimi Evropian duhet të lëvizë më shpejt në rajonin e Ballkanit Perëndimor pas ngjarjeve të fundit në Ukrainë.

“Bashkimi Evropian më në fund e ka kuptuar se kjo është një temë e rëndësishme. Politika e kaluar ishte e keqe, ku e vuri gjithë përgjegjësinë për anëtarësim në kurrizin e vendeve të rajonit. BE-ja duhej të ndihmonte më shumë dhe të ishte më aktive për të ndihmuar transformimin e rajonit”, tha ish-zyrtari i aleancës më të madhe ushtarake në botë.

Ai deklaroi se Perëndimi tashmë po shihet se ka shtuar interesimin për rajonin, duke iu referuar takimit mes kryeministrit të Kosovës dhe presidentit serb me kancelarin gjerman në Berlin.

“Tani kemi sërish shumë aktivitete, shohim se kancelari gjerman, Olaf Scholz organizoi një takim mes presidentit serb, Aleksandar Vuçiq dhe kryeministrit të Kosovës, Albin Kurti. Ministrja e Jashtme gjermane, Annalena Baerbock, pati një turne të madh në rajon. I dërguari i SHBA-së, Gabriel Escobar, është gjithashtu aktiv. Perëndimi tregon sërish se Ballkani është i rëndësishëm për të”, deklaroi 68-vjeçari.

Ai pohoi se BE-ja duhet të ketë një qasje më fleksibile, veçanërisht me vendet kandidate për anëtarësim në Unionin Evropian.

“Bashkimi Evropian duhet të zhvillojë një qasje më fleksibile dhe t’u sigurojë vendeve kandidate disa përfitime nga anëtarësimi, veçanërisht në aspektin ekonomik. Disa në Bruksel mendojnë se është e nevojshme të ndryshohen traktatet bazë të BE-së, gjë që nuk është asnjëherë e lehtë, por çështja është se po kërkohet një zgjidhje inovative”, përfundoi Shea.

Ndryshe, Shea ka qenë nëpunës civil dhe anëtar i Stafit Ndërkombëtar të NATO-s për 38 vjet, kohë gjatë së cilës ka mbajtur një sërë postesh të larta në një gamë të gjerë fushash, duke përfshirë marrëdhëniet me jashtë, shtypin dhe median, si dhe politikat e planifikimit.

Aktualisht është anëtar i Grupit të Këshilltarëve Strategjikë të Komandës së Operacioneve Speciale të NATO-s në SHAPE në Belgjikë.