Nestle ndalon pjesën më të madhe të prodhimit në Rusi

Nestle, prodhuesi më i madh i ushqimit në botë, tha se po pezullon shumicën dërrmuese të prodhimit të saj në Rusi, mes presionit në rritje ndaj shumëkombëseve për t’u larguar plotësisht nga vendi pas pushtimit të Ukrainës, përcjell albinfo.ch.

Kompania zvicerane po ndalon shitjen e markave si KitKat dhe Nesquik dhe do të fokusohet në ushqimet thelbësore, duke përfshirë ushqimin për fëmijë dhe ushqimin mjekësor, tha kompania në një deklaratë të mërkurën.

Kompania është në procesin e identifikimit të zgjidhjeve për fabrikat dhe punonjësit e saj në Rusi, të cilët do të vazhdojnë të paguhen, tha një zëdhënës, duke shtuar se masa do të thotë që Nestle do të pezullojë pjesën më të madhe të vëllimit të saj të shitjeve të paraluftës në Rusi.

“Ndërsa lufta po vijon në Ukrainë, aktivitetet tona në Rusi do të përqendrohen në sigurimin e ushqimit thelbësor, si ushqimi për foshnjat dhe ushqimi mjekësor/spitalor – jo në fitimin”, tha Nestle në deklaratë, përcjell tutje albinfo.ch.