25 tonelata ndihma zvicerane, në rrugë drejt Ukrainës

Kjo është bërë e ditur nga Departamenti Federal i Punëve të Jashtme. Furnizimet destinohen për popullsinë ukrainase në Ukrainë dhe në vendet fqinje

Zvicra ka nisur ndihmat e para për popullin e Ukrainës. Bëhet fjalë për 25 tonë ndihmash, të cilat janë ngarkuar në një avion mallrash, i cili është nisur drejt Varshavës, Poloni.

Në këtë dërgesë përfshihen ilaçe dhe tenda familjare të pajisura me dyshekë, thasë gjumi, batanije, ngrohës, enë gatimi dhe bombola uji, transmeton albinfo.ch.

Kjo është bërë e ditur nga Departamenti Federal i Punëve të Jashtme (EDA). Furnizimet e ndihmës janë të destinuara për popullsinë ukrainase në Ukrainë dhe në vendet fqinje.

Sipas EDA-së, të mërkurën do të pasojë një kolonë ndihme e përbërë nga gjashtë kamionë të ngarkuar me materiale mjekësore, e cila vihet në dispozicion nga farmacia e ushtrisë e Departamentit Federal të Mbrojtjes, Mbrojtjes Civile dhe Sportit (VBS), transmeton albinfo.ch. Këto përfshijnë defibrilatorë, ventilatorë, maska ​​higjienike, mantela kirurgjikale dhe kostume mbrojtëse mjekësore.

Ndihma Humanitare Federale, e cila është e bazuar në EDA, po ndërton një qendër për furnizimet zvicerane të ndihmës në Poloni, të destinuar për ukrainasit. Kjo synon të lehtësojë dërgesat e ardhshme në Ukrainë dhe në zonën kufitare në Poloni ose edhe vende të tjera të mundshme fqinje.

Dërgesat e ndihmave shoqërohen nga punonjës të Njësisë Zvicerane të Ndihmës Humanitare (SKH).

---