Disa kantone vendosin masa më të ashpra për Covid

Keystone

Ndërsa qeveria federale nuk ka plane të menjëhershme për të futur kufizime të reja për të frenuar përhapjen e Covid, disa kantone zvicerano-gjermane po e bëjnë këtë vetë.

Në Bazel, për shembull, detyrimi për të mbajtur maskë do të rifutet nga e mërkura në të gjitha shkollat ​​nga viti i 5-të, me përjashtim të atyre të vaksinuarve ose të kuruarve.

Në zona të caktuara të Graubünden, mbajtja e maskës është e detyrueshme që nga viti i tretë i shkollës fillore dhe nxënësit testohen dy herë në javë, kurse në Nidwalden, mbajtja e maskës është e detyrueshme që nga e hëna në nivelin e mesëm I dhe për të gjithë mësuesit, përcjell albinfo.ch.

Kantone të tjera po shikojnë gjithashtu masa më të ashpra, duke përfshirë Aargau, i cili po shqyrton mbylljen e bareve dhe restoranteve dhe vendosjen e kufirit prej 100 personash në ngjarjet publike.

Ndërsa kantonet duhet të respektojnë rregullat e Covid të vendosura nga Këshilli Federal, ato mund të miratojnë masat e tyre më të ashpra nëse mendojnë se ka nevojë.