Debati në Zvicër nëse fluturimet ndërmjet Cyrihut dhe Gjenevës duhet të ndërpriten

(KEYSTONE/Salvatore Di Nolfi)

Fluturimet me distanca të shkurtra midis dy aeroporteve ndërkombëtare të Zvicrës kanë qenë të njohura para pandemisë dhe vazhdojnë të funksionojnë, megjithëse me numër të reduktuar fluturimesh. Ato përdoren kryesisht nga pasagjerët transit që lidhen me aeroportet ndërkombëtare nga Cyrihu dhe Gjeneva, shkruan The Local, përcjell albinfo.ch.

Megjithatë, delegatët në seancën vjetore rinore të parlamentit që po zhvillohet tani në Bernë, po bëjnë thirrje për ndërprerjen e shërbimit ajror, duke argumentuar se fluturimi 270 km dhe 30 minuta lë një gjurmë të madhe karboni dhe pasagjerët duhet të udhëtojnë midis dy aeroporteve me tren.

Ky argument u ngrit tashmë në vitin 2019 nga deputetë të Gjelbër dhe socialistë, por Këshilli Federal u përgjigj, atëherë dhe tani, se nëse këto fluturime të brendshme do të ndaloheshin, pasagjerët nuk do të udhëtonin 3.5 orë me tren, por do të lidheshin në qendra të tjera evropiane si p.sh. Frankfurt apo Londër, gjë që do të ishte e dëmshme edhe për mjedisin.