Rastet e reja u rritën me 30% këtë javë në Zvicër

Të pavaksinuarit vazhduan të përbëjnë shumicën e atyre që janë shtruar në spital dhe vdesin me Covid-19 këtë javë

Këtë javë, 10,148 raste të reja të Covid-19 u raportuan në Zvicër, 30% më shumë nga 7,818 të regjistruara një javë më parë. Në bazë të mesatares 7-ditore, numri i rasteve të reja ditore ishte 1,450.

Numri i shtrimeve në spital me Covid-19 ishte i qëndrueshëm. Gjatë 7 ditëve të fundit, 119 pacientë Covid-19 u shtruan në spital me Covid-19 krahasuar me 150 gjatë 7 ditëve të mëparshme. Këtë javë vdekjet nga Covid-19 u rritën. 31 vdekje u regjistruan gjatë 7 ditëve më të fundit krahasuar me 28 gjatë 7 ditëve të mëparshme, përcjell albinfo.ch.

Këtë javë, Patrick Mathys, kreu i vaksinimeve në Zvicër e përshkroi situatën aktuale epidemiologjike si të pafavorshme. Tanja Stadler, kreu i task forcës shkencore Covid-19, paralajmëroi se numri i rasteve mund të dyfishohet me fillimin e dimrit. 1.6 milionë njerëz mbeten pa imunitet në Zvicër, tha ajo.

Të pavaksinuarit vazhduan të përbëjnë shumicën e atyre që janë shtruar në spital dhe vdesin me Covid-19 këtë javë, pavarësisht se përbënin një përqindje relativisht të vogël të atyre në rrezik të sëmundjes së rëndë – 87% e atyre mbi 70 vjeç janë vaksinuar tani. Gjatë 7 ditëve të fundit, 41 nga 119 (34%) personat e shtruar në spital me Covid-19 në Zvicër u regjistruan si të vaksinuar plotësisht. Një arsye pse njerëzit e vaksinuar po përfundojnë në spital është sepse mbrojtja e ofruar nga vaksinat është dobësuar tek grupmoshat më të vjetra që janë vaksinuar më herët dhe kanë sistem imunitar më pak të përgjegjshëm, përcjell tutje albinfo.ch.

Shkalla e vaksinimit në Zvicër mezi është rritur që nga java e kaluar duke u zhvendosur nga 65.51% në 65.89% të popullsisë me të paktën një vaksinë, një rritje prej 0.38%. Në një sondazh të publikuar nga RTS, 22.5% e të anketuarve thanë se nuk do të vaksinoheshin.

Rezistenca ndaj vaksinimit është e dukshme në rrugët e Zvicrës. Fundjavën e kaluar u zhvillua një protestë paqësore e autorizuar në Bernë, e cila ka të ngjarë të jetë e fundit në qytet përpara një votimi më 28 nëntor 2021 mbi ligjet e krijuara nga qeveria për të menaxhuar pandeminë.

---