Organizatorët, “të befasuar dhe trishtuar me anulimin e Alba Festival-it”

"Me befasi dhe trishtim të madh marrim vendimin e këshillit qeveritar për të tërhequr miratimin e dhënë për Festivalin Alba më pak se 48 orë para fillimit të festivalit", shkruajnë organizatorët

Siç ka njoftuar tashmë albinfo.ch, eventi më i madh shqiptar nën qiell të hapur “Alba Fest”, i planifikuar të mbahej në Cyrih më 4 dhe 5 shtator, është anuluar.

Qeveria e Kantonit të Cyrihut ka vendosur të revokojë miratimin e dhënë më herët për Festivalin Alba 2021, thuhet në një njoftim të kësaj qeverie, të publikuar të enjten pasdite.

Ekzekutivi i kantonit shpreh keqardhje për këtë hap, por duke pasur parasysh rrethanat, ai nuk pa asnjë alternativë për këtë.

“Një ngjarje e madhe si Festivali Alba shkakton stres shtesë në spitale. Këshilli qeveritar dëshiron të shmangë një barrë të tillë shtesë për spitalet në situatën aktuale të ndjeshme”, transmeton albinfo.ch.

Organizatorët “të befasuar shumë” me vendimin

Për më tepër, Festivali Alba i drejtohet kryesisht një komuniteti të prekur rëndë nga pandemia. “Rezultatet tregojnë se njerëzit që kthehen nga pushimet nga Ballkani janë më shpesh të infektuar me Covid sesa mesatarja.” Qeveria kantonale mendon se është detyrë e saj e kujdesit të kundërshtojë rrezikun aktualisht në rritje të infeksionit në këtë grup të popullsisë dhe ta mbrojë atë”, vazhdon njoftimi i qeverisë.

Ndërkohë, reagojnë edhe organizatorët. Ata kanë publikuar një deklaratë të parë në mbrëmjen e së enjtes, përcjell albinfo.ch. “Me befasi dhe trishtim të madh marrim vendimin e këshillit qeveritar për të tërhequr miratimin e dhënë për Festivalin Alba më pak se 48 orë para fillimit të festivalit. Ne tani po e shqyrtojmë këtë vendim nga pikëpamja ligjore dhe qëndrimin tonë do ta komunikojmë menjëherë”.

Qëndrimi i plotë pritet të kumtohet të premten.

Të martën, aktiviteti alternativ nën qiell të hapur “Frauenfeld Frauenfeldli”, i cili duhej të mbahej në mes të shtatorit, u anulua për të njëjtën arsye, trasnmeton albinfo.ch. Ndërkaq, edicioni i reduktuar i “Gampel Open Air “me 10.000 vizitorë në ditë, megjithatë, u zhvillua dy javë më parë, ashtu siç ishte planifikuar.

---