Ekspertët zviceranë alarmojnë: “Ardhja e valës tjetër të madhe, e padyshimtë”

Patrick Mathys nga BAG këmbëngul se tani është më e rëndësishme se kurrë të binden njerëzit e pavendosur që të vaksinohen

Në Qendrën Mediale Federale në Bernë, është mbajtur sot një konferencë për media lidhur me zhvillimet më të reja të pandemisë së koronavirusit.

Në konferencë, vlerësimet e tyre para gazetarëve i kanë dhënë: Patrick Mathys, Shef i Seksionit të Menaxhimit të Krizave dhe Bashkëpunimit Ndërkombëtar, BAG; Manuel Bessler, Zëvendës Drejtor, Delegat i Këshillit Federal për Ndihmën Humanitare; Tanja Stadler, kryetarja e re e Task Forca Federale Shkencore të Koronës, Samia Hurst, Zëvendës kryetare e Task Forcës Federale Shkencore të Koronës; Rudolf Hauri, Mjek Kantonal Zug, njëherësh kryetar i Shoqatës së Mjekëve Kantonalë dhe Milo Puhan, Drejtor i Institutit për Epidemiologji, Biostatistikë dhe Parandalim, Universiteti i Cyrihut.

Koha vendimtare për të rritur vaksinimin

Fatkeqësisht, zhvillimi i situatës pandemike në Zvicër është përkeqësuar përsëri dhe numri i shtrimeve në spital sërish është rritur, është shprehur Patrick Mathys nga BAG. Ai këmbëngul se tani është më e rëndësishme se kurrë të binden njerëzit e pavendosur që të vaksinohen, transmeton albinfo.ch

Tanja Stadler, e emëruiar së fundiu shefe e Task Forcës Shkencore ka folur për pikat më të rëndësishme të fazës së normalizimit. Ajo po ashtu ka shpjeguar se mbingarkesa e sistemit shëndetësor duhet të shmanget me çdo kusht.

Gjatë konferencës për shtyp janë bërë pyetje edhe për vaksinimin e tretë dhe për bllokimet eventuale të mëtejshme.

Masat e tjera të ashpra duhet të shmangen, por ato nuk mund të përjashtohen nëse situata nuk përmirësohet, ka qenë qëndrimi i të gjithë ekspertëve, pjesëmarrës në këtë konferencë. Një kohë për një vaksinim përforcues (të tretë) ende nuk është përcaktuar, por kjo sigurisht që do të jetë një çështje për t`u trajtuar në planin afatmesëm.

Numri i vdekjeve, i vogël por rritet numri i shtrimeve në spital 

“Numri i vdekjeve mbetet në një nivel shumë të ulët. Por, shtrimet në spital janë rritur për 45 për qind në krahasim me javën e kaluar. Rreth 70 përqind e shtretërve të kujdesit intensiv janë të zëna”, thotë Mathys. Megjithatë, sipas tij, situata në njësitë e kujdesit intensiv nuk është ende shqetësuese.

“Fatkeqësisht, numri i rasteve të konfirmuara në laborator po rritet përsëri,” thotë Mathys, përcjell albinfo.ch. Që nga dje ka përsëri mbi 3000 raste. Incidenca 14-ditore është rreth 265 raste për 100 banorë. “Pranimet në spitale janë dhjetëfishuar që nga fillimi i korrikut,” shpjegon Mathys. “Fatkeqësisht, zhvillimi nuk po shkon në drejtimin e dëshiruar”.

---