Korona ul numrin e aksidenteve në Zvicër, Suva ul çmimet e sigurimit

SUVA do të rimbursojë të siguruarit e saj me këto para në vitin 2022, gjë që do të çojë në "pagesat historikisht më të ulëta"

Gjatë periudhës së bllokimit në Zvicër, numri i njerëzve që kanë  pasur aksidente ka qenë dukshëm më i ulët se në vitet tjera.

Kjo ka pasur një ndikim të konsiderueshëm në financat e kompanisë së sigurimit të aksidenteve Suva, shkruan srf.ch.

Kështu, ajo ka katërfishuar fitimin e saj në 241 milion franga, gjatë vitit 2020, transmeton albinfo.ch. Për këtë arsye SUVA, në vitin e ardhshëm, do të zvogëlojë primet e sigurimit (do të ulen pagesat që bëjnë të siguruarit në SUVA).

Pa efektin e veçantë të Covid-it,  Suva do të kishte rënë “në të kuqen” sa i përket llogaritjes së rrezikut, me një deficit prej 17 milionë frangash, ka thënë  shefi i financave, Hubert Niggli. Pandemia e koronës tani i ka sjellë asaj një tepricë të jashtëzakonshme prej 253 milionë frangash.

Kështu, SUVA do të rimbursojë të siguruarit e saj me këto para në vitin 2022, gjë që do të çojë në “prime historikisht më të ulëta”.

Megjithatë diapazoni midis degëve të veçanta është i gjerë, ka thënë tutje Niggli, transmeton albinfo.ch. Për shembull, ulja e numrit të aksidenteve në punë në aviacion ishte 54 për qind. Për sektorët në të cilët nuk ka pasur rënie të numrit të aksidenteve nuk do të ketë kthim parash ose rimbursim.

Krahasuar me vitin e kaluar, aksidentet në punë kanë rënë për 10.8 për qind ndërsa aksidentet e kohës së lirë,  10.9 për qind.

Gjithsej 431,827 aksidente dhe sëmundje profesionale janë raportuar tek siguruesi i aksidenteve, që përbën rënie prej 10 për qind në krahasim me vitin e kaluar.

---