OBSH miraton për përdorim emergjent vaksinën Sinovac

Lista e emergjencave të OBSH-së është një sinjal për rregullatorët kombëtar mbi sigurinë dhe efikasitetin e një produkti

Organizata Botërore e Shëndetësisë ka aprovuar të martën e 1 qershorit vaksinën Covid-19, të prodhuar nga kompania Sinovac Biotech për listën e përdorimit emergjent. Kjo është vaksina e dytë kineze që merr miratimin e OBSH-së pas vaksinës Sinopharm.

Shqipëria ka filluar vaksinimin e popullatës së saj që prej muajit mars me dozën kineze të Sinovac dhe vaksinës tjetër CoronaVac.

Këtë lajm e ka ‘festuar’ në rrjetin social Twitter edhe ministrja e Shëndetësisë dhe Mbrojtjes Sociale, Ogerta Manastirliu.

“OBSH aprovon përdorimin emergjent të vaksinës së kompanisë Sinovac, CoronaVac Covid-19, duke garantuar që plotëson standardet ndërkombëtare të sigurisë, efikasitetit dhe prodhimit” shkruhet në statusin e saj.

Lista e emergjencave të OBSH-së është një sinjal për rregullatorët kombëtar mbi sigurinë dhe efikasitetin e një produkti. Kjo do të lejojë gjithashtu që të përfshihet regjistrimi në COVAX, programi global për të siguruar vaksina kryesisht për vendet e varfra, të cilat aktualisht përballen me probleme të mëdha të furnizimit për shkak të pezullimit të eksporteve të vaksinave nga India, transmeton AP, përcjell Albinfo.ch

Në një deklaratë, paneli i pavarur i ekspertëve tha se rekomandoi vaksinën e Sinovac për të rriturit mbi 18 vjeç, me një dozë të dytë 2-4 javë më vonë. Nuk kishte asnjë kufizim të sipërm të moshës pasi të dhënat sugjerojnë se ka të ngjarë të ketë një efekt mbrojtës tek njerëzit e moshuar.

Grupi këshillimor teknik i OBSH-së, i cili filloi të mblidhej më 5 maj, mori vendimin pasi shqyrtoi të dhënat më të fundit klinike mbi sigurinë dhe efikasitetin e vaksinës Sinovac, si dhe praktikat e prodhimit të kompanisë.

Një vaksinë e tretë kineze, e prodhuar nga CanSino Biologics, ka paraqitur të dhëna të provës klinike, por nuk është planifikuar asnjë rishikim i OBSH-së.

Sinovac tha se kishte furnizuar më shumë se 600 milionë doza të vaksinës së saj brenda dhe jashtë vendit deri në fund të majit dhe mbi 430 milionë doza janë administruar.

Rezultatet e efikasitetit të vaksinës treguan se vaksina parandaloi sëmundjen simptomatike në 51% të atyre të vaksinuar dhe parandaloi COVID-19 e rëndë dhe shtrimin në spital në 100% të popullatës së studiuar, tha OBSH-ja.

Grupi i Veçantë Këshillimor Strategjik i OBSH-së (SAGE) kishte thënë më herët në një dokument rishikimi se efikasiteti i vaksinës në provat klinike të Fazës së tretë në shumë vende varionte nga 51% në 84%.

Ekspertët e SAGE, të cilët lëshojnë rekomandime të politikave për shtetet dhe udhëzimet e dozimit, shqyrtuan të dhënat klinike të Sinovac muajin e kaluar.

Kina tashmë ka vendosur qindra miliona doza të dy vaksinave Sinopharm dhe Sinovac që t’i eksportojë ato në shumë vende, veçanërisht në Amerikën Latine, Azi dhe Afrikë.

 

---