Sa zviceranë jetojnë jashtë vendit dhe sa prej tyre në trojet shqiptare

Në Kosovë, në vitin 2020 kanë qenë të regjistruar si banorë të atjeshëm 480 shtetas zviceranë, në Shqipëri 73 dhe në Maqedoninë e Veriut, 384

Zakonisht flitet për numrin e qytetarëve të huaj në Zvicër, përfshirë edhe ata me prejardhje shqiptare. Por edhe zviceranët kanë “të  huajt e tyre”. Një nga dhjetë persona me pasaportë zvicerane nuk jeton në Zvicër.

Statistikat e botuara sot japin një pasqyrë të jetës së zviceranëve jashtë vendit – dhe nga cilat vende ka pasur më shumë të çegjistruar gjatë vitit 2020, vitit “të koronës”.

Në fund të vitit të kaluar, 776,296 shtetas zviceranë kanë qenë të regjistruar në një përfaqësi kompetente zvicerane jashtë vendit, raporton watson.ch. Kjo është pak më shumë se në vitin 2019, transmeton albinfo.ch. Ndryshe, ky është një tregues se edhe në vitin pandemik ka vazhduar tendenca e rritjes së numrit të zviceranëve që jetojnë jashtë. Megjithatë, kjo tendencë është treguar pak më e vogël se në vitet e mëparshme.

Vendet me më shumë zviceranë janë të njëjta prej vitesh. Kryeson Franca, e cila vitin e kaluar strehonte 200,000 nga zviceranët që jetonin jashtë Zvicrës.

Kjo është lista e vendeve me më shumë zviceranë
Franca: 200,905
Gjermania: 94,555
SHBA: 81,335
Italia: 50,170
Kanadaja: 40,645
Mbretëria e Bashkuar: 37,727
Australia: 26,687
Spanja: 24,545
Izraeli: 21,425
Austria: 17,017

Në mesin e më shumë se 700,000 zviceranëve jashtë vendit ka sigurisht mjaft familje me fëmijë : përqindja e zviceranëve të mitur jashtë vendit është pothuajse e pandryshuar, rreth 21 për qind.

Përqindja e të rinjve 18 deri në 64 vjeç gjithashtu ka mbetur e ngjashme, 56.7 për qind, përcjell albinfo.ch. Grupi i të moshuarve është rritur më së shumti: kjo ishte 22.2 për qind në vitin 2020 që tregon për një rritje prej 2.8 për qind krahasuar me një vit më parë.

Është interesante se 662 shtetas zviceranë të moshës mbi 100 vjeçare figurojnë të regjistruar jashtë vendit. Kjo korrespondon me normën mahnitëse 9  mbi 100 vjeçarë në 10,000 zviceranë jashtë vendit. Në Zvicër kjo shkallë është vetëm 2 në 10,000.

Vetëm një e katërta e zviceranëve jashtë vendit kanë vetëm pasaportën e kuqe – tri të katërtat ndërkaq, janë kanë shtetësi të dyfishtë ose të shumëfishtë

Me 54 për qind, jashtë vendit jetojnë pak më shumë gra zvicerane sesa burra.

Në Kosovë, në vitin 2020 kanë qenë të regjistruar si banorë të atjeshëm 480 shtetas zviceranë, në Shqipëri vetëm 73 dhe në Maqedoninë e Veriut, 384, transmeton albinfo.ch.

Listat e mëposhtme tregojnë përqindjen më të madhe të shteteve  “fituese” dhe atyre “humbëse” nga viti i kaluar krahasuar me vitin 2019, sa i takon rritjes ose zvogëlimit të numrit të zviceranëve në shtetet përkatëse.

Fituesit më të mëdhenj

Shtet-Qyteti i Vatikanit: + 12,3% (+16 zviceranë jashtë vendit)
Ukraina: + 10.0% (+19)
Bullgaria: + 8.6% (+26)
Mali i Zi: + 7.3% (+8)
Serbia: + 7% (+186)

Humbësit më të mëdhenj

Libani: -14.8% (-203 zviceranë jashtë vendit)
Etiopia: -13.1% (-29)
Myanmari: -12.2% (-16)
Bahamas: -10.4% (-38)
Venezuela: -9.9% (-101)

---