Osmani: Në krijimin e raporteve Kosovë-Zvicër ka kontribuar edhe diaspora

Në vazhdën e takimeve zyrtare në Zvicër, u.d e presidentes së Kosovës, Vjosa Osmani u takua me presidentin e senatit zviceran Alex Kuprecht, raporton Albinfo.ch.

Sipas njoftimit të zyrës së Osmanit, përveç se u rikonfirmua raporti i shkëlqyeshëm ndërmjet Kosovës e Zvicrës, në këtë takim u potencua fakti se për krijimin e raporteve Kosovë-Zvicër ka kontribuar dukshëm edhe diaspora.

“Në qendër të diskutimeve ishte rëndësia e bashkëpunimit me Zvicrën në drejtim të fuqizimit të sundimit të ligjit, si bazë për konsolidimin e shtetndërtimit, por edhe funksionimit të suksesshëm të shtetit. Konstatuam se një punë serioze në këtë drejtim, përveç se ndikon në përmirësimin e mirëqenies të qytetarëve të Kosovës, është edhe mesazh i suksesit ndaj miqve e aleatëve tanë”, thuhet në njoftim.
Nga ana tjetër bëhet e ditur se Kuprecht konfirmoi se Zvicra do të angazhohet gjithmonë për Kosovën, gjersa u diskutua për mundësitë që ekzistojnë drejt tërheqjes së investimeve në fusha të ndryshme të ekonomisë, fuqizimit të grave dhe krijimit të vendeve të punës për të rinjtë.

“Takimet e sotme shënojnë hapa të rëndësishëm drejt arritjes së këtyre objektivave”