Mërgimtarët në Merdare: “Kemi ardhur nga Austria dhe Gjermania vetëm për të votuar”

Mërgimtari, Bejtush Isufi ka marrë rrugën nga Gjermania për të marrë pjesë në zgjedhjet e Kosovës, sot, e diele, transmeton albinfo.ch.

Ai deklaroi se ka bërë 4 mijë km, vajtje-ardhje  rrugë vetëm për të votuar.

Mërgimtari bën të ditur se nuk e shfrytëzon të drejtën për të votuar me postë sepse nuk ka besim tek ky proces. Nuk mungoi edhe një thirrje e tij për qeverinë e ardhshme që ta zgjidhë këtë problem.

“Kam ardhur nga Gjermania enkas për të votuar, është hera e parë që votoj. Lus qeverinë e ardhshme që të na mundësojë që përmes postës, ose mes pikave, ambasadave, klubeve, ekipeve të futbollit, në shkolla, shtëpitë e kulturës, të na jepet mundësia për të votuar. Kam bërë 4 mijë km rrugë vajtje-ardhje në këtë borë vetëm e vetëm për të votuar, me postë ka shumë komplikime. Shpesh herë kam marrë pjesë në votime me postë, por nuk kam marrë një konfirmim. Nga frika që do të më humbasë vota, kam ardhur enkas për të votuar”, deklaroi Bejtush Isufi.

Nga ana tjetër, edhe mërgimtarët nga shteti Austriak deklaruan se ata kanë ardhur enkas vetëm për të votuar sot dhe se vota në mënyre fizke është më e besushme për ta.

Në pikën kufitare në Merdare, shihet një numër i konsiderueshëm i veturave të cilët janë duke u larguar edhe nga Kosova, duke u nisur në vendet përkatëse që jetojnë dhe disa prej tyre janë shprehur që kanë ardhur enkas për të votuar.

“Kam ardh për me votu nga Austria”, u shpreh njëri nga mërgimtarët. /Albinfo.ch