Vendet e Quintit bëjnë thirrje për eliminim të ndërhyrjes politike në procesin zgjedhor

Derisa në Kosovë vazhdon debati rreth listave zgjedhore për zgjedhjet e 14 shkurtit, shtetet anëtare të Quintit (SHBA, Gjermania, Mbretëria e Bashkuar, Franca dhe Italia) kanë bërë thirrje për qetësi, duke kërkuar që të gjitha palët e përfshira në zgjedhjet e parakohshme parlamentare të 14 shkurtit në Kosovë t’i ndjekin rrugët ligjore për apelimin e vendimeve të fundit të marra në Komisionin Qendror të Zgjedhjeve, sa i përket certifikimit të kandidatëve për deputetë, raporton Albinfo.ch.

“U bëjmë thirrje të gjithëve që të përmbahen nga sulmet personale nxitëse dhe spekulative”, thuhet në deklaratën e përfaqësuesve të vendeve të Quintit në Kosovë.

Përmes kësaj deklarate bëhet e ditur se të hënën ata janë takuar me kryetaren e KQZ-së, Valdete Daka, dhe se në këtë takim kanë shprehur planet e tyre për të monitoruar zgjedhjet e 14 shkurtit.

“Derisa pandemia ka krijuar sfida shtesë, jemi të sigurt në aftësinë e KQZ-së për t’i mbikëqyrur zgjedhjet. E theksuam që KQZ-ja duhet të kujdeset që procesi zgjedhor është transparent dhe i pazënë nga ndërhyrjet politike”, thuhet në deklaratë.