Franca intensifikon luftën kundër islamizmit radikal

Presidenti francez, Emmanuel Macron dhe kabineti i tij u takuan sot në Paris për të diskutuar mënyrat për të luftuar islamizmin radikal.

Gjatë këtij takimi u parashikuan ndryshime në ligj për të lehtësuar shpërbërjen e shoqatave që vënë në dyshim vlerat e Francës.

Pritet të ndëshkohen, gjithashtu, edhe kërcënimi ose frikësimi i oficerëve të sigurisë dhe gjuha e urrejtjes në internet.

“Ky projektligj nuk është kundër feve”, tha kryeministri Jean Castex pas takimit të kabinetit, raporton Dpa, përcjell Albinfo.ch.

“Armiku i Republikës është një ideologji politike e quajtur islamizëm radikal, që synon të përçajë francezët. Ne kurrë nuk do ta barazojmë atë me myslimanët dhe unë besoj se myslimanët janë ndër viktimat e para të kësaj ideologjie”, shtoi ai.

Ligji i planifikuar, që synon të forcojë parimet republikane, është në diskutim prej disa kohësh.

Macron dhe qeveria e tij kërkojnë ta luftojnë islamizmin radikal aty ku të rinjtë janë më të prekshëm, në xhami të veçanta, jashtë shkolle dhe në internet.