Sot Zvicra voton në referendum për dy iniciativa popullore

Fjala është për iniciativën popullore "Për kompanitë e përgjegjshme - për të mbrojtur njerëzit dhe mjedisin" dhe "Për ndalimin e financimit të prodhuesve të materialeve të luftës"

Sot, qytetarët me të drejtë vote do të vendosin në referendum për dy iniciativa popullore në nivel vendi.

Fjala është për iniciativën popullore “Për kompanitë e përgjegjshme – për të mbrojtur njerëzit dhe mjedisin” dhe “Për ndalimin e financimit të prodhuesve të materialeve të luftës”, shkruan srf.ch.

Projekt-ligji i iniciativës së parë kërkon që kompanitë me qendër në Zvicër të respektojnë edhe jashtë vendit të drejtat e njeriut dhe standardet mjedisore të njohura ndërkombëtarisht, transmeton albinfo.ch.

Iniciativa e dytë “Për ndalimin e financimit të prodhuesve të materialeve të luftës” kërkon që Banka Kombëtare Zvicerane, fondacionet dhe institucionet pensionale shtetërore dhe profesionale të ndalohen të financojnë prodhuesit e materialeve të luftës.

Në të njëjtën kohë, sot, në njëmbëdhjetë kantone, elektorati vendos për disa çështje kantonale.

Kështu në kantonin Basel-Stadt, qeveria plotësohet përmes raundit të dytë të votimit dhe zgjidhet kryetari i qeverisë.

Ndër votimet në nivele komunash, vlen të përmenden sidomos zgjedhjet në qytetin e Bernës.

 

---