Task Forca Covid: Nëse vazhdon kështu, do të kemi mbi 2000 infeksione në ditë

"Me këtë ritëm që po shkon rritja e numrit të rasteve ne do të duhet të llogarisim me mbi 2000 raste në ditë në tetor". Kështu thonë në Task Forcën zvicerane

Task Forca Nacionale e Zvicrës, e ngritur për të luftuar koronavirusin konstaton një rritje të madhe të infeksioneve midis grupeve të rrezikut. Prandaj, Zvicra duhet të reagojë para se spitalet të mbushen përsëri, shkruan srf.ch.

“Në periudhën nga qershori deri në shtator numri i rasteve qe dyfishuar mesatarisht në çdo 3 deri në 4 javë”, thuhet në raportin e Task Forcës Kombëtare, të publikuar të premten, transmeton albinfo.ch. Por, në fillim të tetorit, dyfishimi ndodhi edhe më shpejt se në muajt e kaluar.

“Prandaj, nëse kjo tendencë vazhdon kështu, duhet pritur mbi 2000 raste në ditë gjatë tetorit.”

Sipas task forcës, në Zvicër duhet të kryhen më shumë teste se deri më tash.

Shkalla e pozitivitetit në ditët e fundit ka qenë mbi 7 për qind, ndërkohë që kufiri i rekomanduar i OBSH-së është 5 për qind.

Numri i të shtruarve në spital dhe i vdekjeve është dhjetëfishuar që nga qershori, por është akoma dukshëm më i ulët se në pranverë, përcjell albinfo.ch. “Tani mund të shihen më shumë infeksione tek grupet e rrezikut”.

Task forca parashikon një rritje të numrit të shtrimeve në spital. “Një rritje e shtrimeve në spital është tashmë e dukshme në zonat ku edhe rastet janë rritur më shumë.”

Për task forcën, “stabilizimi dhe zvogëlimi i numrit të rasteve ka përparësinë më të lartë. “Ne nuk duhet të reagojmë kur nivelet e shtrimit ose vdekjeve të jenë të larta”. Prandaj ekspertët këshillojnë:

• Zbatimin rigoroz të masave ekzistuese.

• Zvogëlimin e  numrit dhe të madhësisë së tubimeve, veçanërisht në ambiente të mbyllura.

• Vënien e vazhdueshme e maskave në ambiente të mbyllura.

---