Hyn vetura e parë pa paguar për Kartonin e Gjelbërt në Kosovë

Nga Austria në Kosovë (Dokument)

Së fundmi, zëvendësguvernatori i Bankës Qendrore të Kosovës, Sokol Havolli, ka bërë të ditur se është printuar polica e parë e sigurimit kufitar për diasporën me zero kosto, e subvencionuar nga Qeveria e Kosovës, transmeton albinfo.ch.

“Pas angazhimit të përbashkë të Bankës Qendrore të Republikës së Kosovës, Qeverisë së Kosovës dhe Byrosë Kosovare të Sigurimit, në minutat e parë të datës 1 gusht 2020, u printua polica e parë e sigurimit për diasporën me zero kosto, e subvencionuar nga Qeveria”, ka shkruar Havolli.

Po ashtu, Havolli ka thënë se në vazhdim duhet të punohet për antarësimin e Kosovës në Kartonin e Gjelbër.

Sipas tij, për të arritur këtë, është e domosdoshme ulja e numrit të automjeteve të pasiguruara në vend.

Qeveria e Kosovës para disa ditësh ka marrë vendim për mbulimin e shpenzimeve të Kartonit të Gjelbër për diasporën, nga 1 gushti deri më 31 dhjetor të këtij viti.

Ministrja e Financave, Hykmete Bajrami, tha se me këtë vendim lehtësohet ardhja e diasporës, ndërsa bëri të ditur se çmimi i primit është zbritur 35 për qind. /Albinfo.ch

---