Futbolli në Kroaci, sërish pa spektatorë

Foto ilustrim

Pas rritjes së numrit të të infektuarve me COVID-19 në Kroaci, Federata e Futbollit të Kroacisë e ka ndryshuar politikën që lejonte tifozët në lojëra dhe tha se do ta përfundojë sezonin me stadiume boshe, përcjell albinfo.ch.

Disa spektatorë janë lejuar në ngjarjet sportive në Kroaci qysh në mes të qershorit, përfshirë lojërat e futbollit dhe një turne tenisi.

Liga e kategorisë më të lartë të burrave, e fituar nga Dinamo Zagreb, luan edhe një raund të shtunën, ndërsa finalja e Kupës Kombëtare mbahet më 1 gusht.

Kufizimi për stadiume boshe vlen edhe për garat e grave.

Të hënën, Kroacia, vend me 4 milionë banorë, ka raportuar në total 122 viktima nga koronavirusi dhe 4,370 raste pozitive.