Zvicër: Koronavirusi rrit papunësinë brenda një muaji nga 2.5% në 2.9%

Seco: "Sidomos nga mesi i marsit, pas shpalljes së gjendjes së jashtëzakonshme nga Qeveria federale, kishim një ngritje të lartë të numrit të të papunëve"

Në fund të marsit gjendja në tregun e punës në Zvicër, si pasojë e koronavirusit, ka pësuar një përkeqësim të konsiderueshëm shkruan srf.ch.

Kështu, shkalla e papunësisë në fund të muajit shkurt 2020 ishte 2.5%, ndërsa në mars 2019 kishte qenë 2.4%, transmeton albinfo.ch. Por më 31 mars, siç njofton Sekretariati Shtetëror për Ekonomi (Seco) ajo tashmë ishte ngjitur në 2.9%.

Sidomos nga mesi i marsit, pas shpalljes së gjendjes së jashtëzakonshme nga Qeveria federale, kishim një ngritje të lartë të numrit të të papunëve, ka deklaruar për mediat një zyrtar i lartë i Seco-s.

Në krahasim me marsin e vitit 2019 numrit të të papunëve në Zvicër i janë shtuar 23.283 veta, që është një shtim prej 20.7%, duke e ngritur numrin e përgjithshëm të të papunëve në 135.624 sish.

Ndërsa shkalla e papunësisë së të rinjve ka pësuar ngritje edhe më të madhe se sa ajo e përgjithshme, përcjell albinfo.ch. Ajo në fund të marsit është rritur për 25.8% në krahasim me marsin e vitit 2019, ose, shprehur në shifra, numrit të të papunëve i janë shtuar edhe 2983 veta, duke e ngritur numrin e përgjithshëm në 14.556 sish.

Në fund të marsit 2020 në zyrat për ndërmjetësim të punës në Zvicër kanë qenë të regjistruar 213.897 veta, ose 23.498 më shumë se në fund të shkurtit. Zyrtarisht në Zvicër janë 31.472 vende të lira pune.

---