Testohen vetëm individët me indikacione epidemiologjike në Kosovë

(AP Photo/Jessica Hill)

Shefi i Departamentit të Mikrobiologjisë në Institutin Kombëtar të Shëndetësisë Publike në Kosovë, Xhevat Jakupi, ka thënë për mediat kosovare se personat të cilët nuk kanë indikacione epidemiologjike nuk testohen, përcjell albinfo.ch.

Ai ka thënë se ka teste të mjaftueshme për testimin e personave me indikacione. “Të gjithë individëve të cilët kanë indikacion epidemiologjik është duke iu kryer testi dhe rezultatin po e marrin brenda ditës, e më së shumti brenda 24 orëve. Testimi i individëve jashtë indikacioneve epidemiologjike për momentin nuk kryhet. Ka teste të mjaftueshme për testimin e çdo individi që ka indikacion epidemiologjik. Është duke u testuar mjaft, po e vëreni nga numri total i të testuarve deri më 5 prill 2020 (1964 mostra), vetëm 7% janë raste pozitive”.

Jakupi është shprehur se janë duke punuar 7 ditë në javë, pa orar të kufizuar dhe se janë të dedikuar në kryerjen e punës profesionale.

Ai ka theksuar se si vështirësi për momentin kanë sigurimin e materialit laboratorik për punë të përditshme. “Personeli në Laboratorin e Mikrobiologjisë Molekulare në IKSHPK është plotësisht i dedikuar në kryerjen e punës profesionale, përkatësisht në kryerjen e testimeve për qytetarët e Kosovës që i plotësojnë indikacionet epidemiologjike. Jemi duke punuar shtatë ditë në javë, pa orar të kufizuar. Për momentin nuk ka ndonjë vështirësi të theksuar, përveç presionit social, që po e vërejmë në medie dhe sigurimit të materialit laboratorik për punë të përditshme”, ka shtuar ai.