Mbi 1 mijë thirrje të qytetarëve për t’u ankuar lidhur me ngritjen e çmimeve

Ministrja e Tregtisë, Ekonomisë, Punësimit, Ndërmarrësisë dhe Investimeve Strategjike, Rozeta Hajdari, tha se në Qendrën e Thirrjeve për Konsumatorë janë pranuar afro 1 mijë thirrje, të cilat u janë adresuar institucioneve relevante të zbatimit të ligjit.

Shumica e këtyre thirrjeve kishin të bënin me ngritjen e çmimeve të produkteve ushqimore, të cilat i janë adresuar institucioneve relevante për zbatimin e ligjit.

“Ankesat në përgjithësi kishin të bënin me ngritjen e çmimit në mënyrë të menjëhershme dhe pa kritere. Në përgjithësi, të çmimeve për produktet ushqimore”, shtoi Hajdari.

Ministrja tha se po ashtu inspektorët e punës që janë në terren dorëzojnë raportet dy herë në ditë lidhur me ecurinë e punës.

“Inspektorati i Tregut ka kryer inspektime në 900 subjekte afariste dhe nga këtu janë gjetur në mbi 30 shkelje kryesisht të ngritjes së çmimeve. Për të adresuar këto shkelje janë marrë masa sipas legjislacionit në fuqi”, deklaroi ministrja.

Ajo po ashtu bëri të ditur se Inspektorati i Punës ka kryer 350 inspektime dhe shkeljet janë hasur në përgjithësi në mungesë të pajisjeve personale mbrojtëse, pastaj edhe në dezinfektim të hapësirave dhe në mosrespektim të distancës së rekomanduar.