Ngjyrat e Newborn-it u kushtohen viktimave të dhunuara gjatë luftës

"Të bëhemi zëri i tyre"

Sot, me rastin e pavarësisë së Kosovës Newborn-i i famshëm është ngjyrosur me të tjera ngjyra dhe me fjalë që u dedikohen viktimave të abuzimit seksual gjatë konflikteve, anembanë botës.

“Luftërat e pafundme sjellin shtypje, përdhunime e shpërfillje”, është shkruar mbi shkronjat e Newborn-it të Prishtinës.

Dizajnues i këtij punimi është Fisnik Ismaili, i cili në faqen e tij, bashkë me dizajnin, ka shkruar:

“Po bahen 21 vjet që neglizhohen, s’pranohen prej shoqërisë, përulen e nënçmohen, përderisa çështja e tyne shukatet. Konsiderohet si marre. Injorohet vazhdimisht fakti që 20,000 janë përdhunue gjatë luftës, derisa ato kanë vazhdue me shumë mund me iu kthye jetës normale, me përbuzjen më të madhe që ua kemi dhanë ne, e që hala s’po bahemi zani i tyne sa duhet”.

Mbi shkronjat e Newborn-it janë shkruar edhe pjesë të rrëfimeve të viktimave të dhunuara gjatë luftës. Një ndër to, Vasfije Krasniqi Goodman, e cila kohë më parë publikisht doli dhe tregoi se ka qenë e dhunuar gjatë luftës, ka shpërndarë fotografitë e dizajnuara për viktimat e dhunës dhe ka shkruar:

“Kur do do i harrojmë 20 mijë. Fisi na e përkujton që edhe ne jemi kategori e luftës. Bravo, Fis”.

---