Polici kërcënues nga Winterthur-i jep dorëheqje nga puna

Zëdhënësi nuk ka qenë në gjendje të thotë nëse ky shpërthim kërcënimesh e sharjesh do të ketë edhe pasoja të tjera për policin

Një video, në të cilën shihej një polic duke kërcënuar dhe sharë shoferin e një makine në autostradën A1 të Winterthurit, ka bërë një xhiro të madhe në internet javën e kaluar. Pas publikimit të rastit, policia e Winterthurit e kishte pezulluar nga puna policin problematik, shkruan sda.ch.

Ngjarja ka ndodhur në shtator, por në rrjetet sociale është shpërndarë para pak ditësh, transmeton albinfo.ch. Aty shihet polici duke iu drejtuar ngasësit të makinës, në prani të fëmijës së këtij të dytit, veç tjerash me këto fjalë: “Unë të mbys, ty, dreq i mallkuar”. Vajza e vogël e shoferit, që ndodhej në karrigen pranë tij, kishte shpërthyer në lot.

Ndërsa sot vjen lajmi nga Policia e Winterthurit se polici në fjalë ka dhënë dorëheqje në mënyrë të rregullt nga puna, përcjell albinfo.ch. Këtë informacion e ka vërtetuar për mediat lokale edhe një zëdhënës i policisë në fjalë.

Zëdhënësi nuk ka qenë në gjendje të thotë nëse ky shpërthim kërcënimesh e sharjesh do të ketë edhe pasoja tjera për policin.

Policia Kantonale e Cyrihut është duke zhvilluar hetime, ndërsa polici, deri në vendimin e ardhshëm, vazhdon të jetë i pezulluar nga puna.

---