Zvicra ndalon “Shtetin Islamik” me urdhëresë të veçantë

Qeveria e Zvicrës ka vendosur një urdhëresë në këtë drejtim që hyn në fuqi të enjten (nesër) dhe mbetet valide gjatë gjashtë muajve të ardhshëm

Qeveria e Zvicrës ka marrë sot  vendimin për të shpallur të ndaluar grupin xhihadist të Shtetit Islamik (IS) në Zvicër. Ajo ka vendosur një urdhëresë në këtë drejtim që hyn në fuqi të enjten (nesër) dhe mbetet valide gjatë gjashtë muajve të ardhshëm.

Grupimi “Shteti Islamik” është duke bërë shkelje të rënda të të drejtave të njeriut, thuhet në një komunikatë të Këshillit Federal të publikuar pasditen e sotme. Mbështetur në përshkallëzimin e javëve të fundit, qeveria e vednit ka vendosur që përmes një urdhërese të ndalojë veprimtarinë e këtyre grupimeve.

Urdhëresa në fjalë bën ndalimin jo vetëm të të gjitha aktiviteteve të organizatës, brenda e jashtë vendit por edhe të gjitha aksionet që i shërbejnë mbështetjes së saj, materiale ose me personel. Në terma konkretë kjo nënkupton ndalimin e grumbullimit të parave, joshjes së anëtarëve ose aksionet tjera propaganduese për organizatën në fjalë.

Kushdo që bie në kundërshtim me këtë ndalesë, në të ardhmen duhet të llogarisë me një dënim deri në tre vjet heqje lirie ose me gjobë. Në rastet e përmendura mund të ngrihen edhe masat pasurore të organizatës në fjalë, thotë komunikata.

Këshilli Federal ka autorizuar Departamentin e Mbrojtjes (VBS) për t`ia ofruar Këshillit një propozim për zgjidhje, në mënyrë që duke filluar nga fundi i vitit të sigurohet jetësimi i ndalimit të IS-it dhe organizatave simotra. Duhet të mbetet në fuqi edhe ndalimi i grupit Al-Kaida dhe organizatave të ngjashme, thuhet më tutje në komunikatë.

Aktualisht nuk është paraparë ndonjë rregullim i ndalimit në shkallë ligji për ndalimin e organizatës, konsideron VBS. Por Qeveria Federale është e gatshme të debatojë rreth zgjidhjeve, në rast se në kuadrin e konsultimeve parlamentare për Ligjin mbi Shërbimin Informativ sillen propozime adekuate, përfundon komunikata.