Zvicra, rol qendror në Asamblenë e Përgjithshme të OKB-së

Presidenti Burkhalter në asamblenë e përgjithshme përfaqëson edhe OSBE-në, shef i të cilës është gjatë këtij mandati

Zvicra, ashtu si asnjë shtet tjetër është treguar më se aktive gjatë punimeve të Asamblesë së Përgjithshme të OKB-së që po zhvillohen këto ditë. Asnjë shtet nuk ka marrë më shumë iniciativa gjatë këtyre punimeve sa Zvicra, e përfaqësuar këtu nga presidenti i Federatës njëherësh ministër i jashtëm, Didier Burkhalter.

I pari i Zvicrës në asamblenë e përgjithshme përfaqëson edhe OSBE-në, shef i të cilës është gjatë mandatit të udhëheqjes së kësaj organizate që aktualisht e ushtron Zvicra.

Burkhalter është angazhuar për të drejtën e njeriut për të pasur qasje në ujë, pastaj për reformën e Këshillit të Sigurimit të OKB-së, raporton srf.ch. Gjithashtu ai është treguar shumë aktiv në përpjekjet për heqjen e dënimit me vdekje, në zgjidhjen e problemit të Ukrainës, në kufizimin e të drejtës së vetos dhe në përforcimin e të drejtës ndërkombëtare humanitare.