Kontrollori mbytet nga treni pasi ngujohet në derën e tij

Punonjësi 54 vjeçar në fjalë ka mbetur i ngujuar në një derë të trenit dhe është bartur zvarrë nga ai, duke mbetur i vdekur

Një përcjellës trenash (kontrollor) ka humbur jetën në një aksident pune që ka ndodhur natën e të dielës, rreth orës 24.00 në Baden të Kantonit Aargau. Punonjësi 54-vjeçar ka mbetur i ngujuar në një derë të trenit dhe është bartur zvarrë, duke mbetur i vdekur, shkruan sda.ch.

Ndërmarrja Hekurudhore Federale Hekurudhore e Zvicrës (SBB) në një komunikatë ka shkruar se trenat e llojit të këtij ku ndodhi aksidneti do t`i nënshtrohen një kontrollimi më të thelluar, transmeton albinfo.ch. “Incidenti na ka prekur thellë dhe ai na obligon që të mos lejojmë kompromise sa i përket sigurisë”, thuhet veç tjerash në komunikatë.

Lokomotivisti i trenit nuk e kishte parë aksidentin, pasi që treni në fjalë ka një gjatësi prej 250 metrash. Kështu, ai e ka nisur trenin në momentin kur është fikur llamba në kabinën e tij, e cila tregon nëse ndonjëra nga dyert është e hapur ose jo.

Por, kalimtarët e rastit në stacionin e trenit në Baden e kanë vënë re aksidentin dhe kanë alarmuar SBB-në. Gjatë kësaj kohe treni me personin e ngujuar në derë ishte nisur. Ai është ndalur vetëm pasi lokomotivisti është informuar nga qendra e drejtimit.

Aksidenti vdekjeprurës po hetohet nga Qendra Zvicerane e hetimeve të Sigurisë Sust.

---