Sindikalistët kërkojnë rritje pagash për 2 për qind

Punëmarrësit zviceranë, me angazhim të shtuar dhe me fleksibilitet të lartë kanë kontribuar që ekonomia e Zvicrës të dalë nga kriza, thuhet në komunikatën e T.S

Federata e sindikatave zvicerane, Travail Suisse ka kërkuar që në vitin e ardhshëm pagat ne gjthë vendin të rriten për 2 për qind. Lëvizja “modeste” në drejtim të rritjes së rrogave viteve të fundit, është arseja për të cilën sindikalistët e kërkojnë këtë rritje.

Punëmarrësit zviceranë, me angazhim të shtuar dhe me fleksibilitet të lartë kanë kontribuar që ekonomia e Zvicrës të dalë nga kriza, thuhet në komunikatën e T.S. Tash, pasi që vitet e krizës ndërkombëtare u kaluan me dëme të pakta dhe koniunktura ndërkohë sërish po stabilizohet, në shumicën e degëve të ekonomisë ka për rritje pagash, shkruan srf.ch. Për këtë arsye Travail Suisse kërkon ngritje pagash prej 2% në gjithë Zvicrën dhe në të gjitha degët e ekonomisë.

Sipas saj, dallimi në paga gjatë viteve të fundit është rritur edhe më shumë. Ndërkohë që pagat e menaxherëve janë rritur shumë, punëmarrësit tjerë kanë gëzuar vetëm rritje minore.

Në Federatën e Sindikatave Travail Suisse bëjnë pjesë, përveç sindikatës Syna që përfshin shumë degë, edhe unioni i hotelerisë dhe gastronomisë (Hotel&Gastro-Union) dhe Transfair. Kjo e fundit përfaqëson pjesërisht administratën publike, postë, Swisscom-in dhe ndërmarrjet e transportit.