Kantoni Neuchatel vendos për pagën minimale

Në Neuchatel ishte votuar qysh në vitin 2011 një iniciativë për pagën minimale dhe kjo ishte futur në kushtetutë. Sot për këtë ka vendosur edhe parlamenti

Kanë kaluar vetëm dhjetë ditë nga refuzimi bindës që votuesit zviceranë i bënë iniciativës për caktimin e një page minimale në nivel të Zvicrës. Por kjo nuk e ka penguar kantonin Neuchatel që të vendosë një pagë minimale në nivel kantoni. Kjo pagë, e caktuar nga Parlamenti kantonal është 20 franga në orë.

Me këtë vendim, kantoni Neuchatel (Neuenburg) bëhet i pari që e vë në fuqi pagën minimale. Së shpejti pritet që edhe kantoni Jura ta bëjë të njëjtin veprim, duke bërë kështu që dy kantone të vogla të Zvicrës frankofone të luajnë rolin e pionierit në këtë fushë të ndjeshme.

Ndryshe, populli me të drejtë vote në Neuchatel e kishte votuar që më 27 nëntor të vitit 2011 një iniciativë për pagën minimale dhe kjo ishte futur në kushtetutë, shkruan nzz.ch.

Ndërkaq, Parlamenti i Kantonit, të mërkurën, më 28 maj ka vendosur me shumicë të theksuar votash për këtë qëndrim. 85 parlamentarë kanë votuar pro, 22 kundër dhe 4 të tjerë kanë qenë të përmbajtur.

Kundërshtarët e pagës minimale në parlamentin e kantonit Neuchatel janë shumica nga partitë SVP/UDC dhe FDP/PLR.