Air Berlin konfirmon incidentin por jo edhe kërcënimin

"Në fluturimin tonë nga Cyrihu në Prishtinë më 11 maj ka ndodhur që një udhëtar ka rënë në sy me sjellje të pazakonshme. Pas aterrimit, atë e ka marrë në dorëzim policia e Kosovës", thotë për albinfo.ch zëdhënësja e Airberlinit, Janina Tzitz

albinfo.ch ka kontaktuar kompaninë ajrore Airberlin për të marrë vesh hollësitë e incidentit të ndodhur të dielën ë linjën Cyrih-Prishtinë të kësaj kompanie. Përgjegjësja për medie ndërkombëtare, Janina Tzitz me këtë rast e ka konfirmuar ndodhjen e incidentit të përmendur.

“Po, në fluturimin tonë nga Cyrihu në Prishtinë më 11 maj ka ndodhur që një udhëtar ka rënë në sy me sjellje të pazakonshme. Por, fluturimi ka rrjedhur sipas planit dhe personi në fjalë i është dorëzuar autoriteteve të sigurisë në Aeroportin e Prishtinës”.

Për natyrën e sjelljes së personit në fjalë zonja Tzitz nuk dëshiron të japë hollësi. E pyetur se çka nënkuptohet me “sjellje të pazakonshme” dhe rreth rrjedhës së përgjithshme të incidentit, ajo tha: “Kjo është ende objekt i hetimeve dhe tash për tash ne mund ta japim vetëm këtë informacion zyrtar. Mund të themi po ashtu se pasagjerit problematik nga dita e incidentit i është ndaluar fluturimi në të gjitha linjat e kompanisë Airberlin dhe kompanive partnere me të cilat ne organizojmë fluturimet”.

albinfo.ch do të sjellë në vazhdim informacione plotësuese lidhur me incidentin që ka ndodhur të dielën në aeroplanin që fluturonte në linjën Cyrih-Prishtinë.