I vë zjarrin radarit për “të shpëtuar” të dashurën nga dënimi!

I riu 18 vjeçar është arrestuar dhe ka pranuar se i ka vënë zjarrin radarit për të shpëtuar nga dënimi i mundshëm të dashurën që kishte vozitur shpejt

Policia e Cyrihut ka arrestuar gjatë vikendit një të ri, i cili i ka vënë zjarrin një radari që mat shpejtësinë e automjeteve në një pikë të qytetit, në qarkun 11.  

Siç bën të ditur policia në një njoftim, zjarrfikësit kanë ndërhyrë shpejtë de e kanë shuar zjarrin por mbrapa kanë mbetur dëme prej dhjeta mijë frangash. Ndërkaq, edhe pas këtij aksidenti, të dhënat që ka regjistruar radari kanë mbetur të paprekura. Këto të dhëna, pasi që janë analizuar i kanë rënë në gjurmë zjarrvënësit , ndonëse ë mënyrë të tërthortë.

Në radar, specialistët e forensikës kanë gjetur se një orë para se t`i vihej zjarri një automobil kishte kaluar me shpejtësi prej 100 kilometrash në orë (brenda qytetit). Pasi që është bërë identifikimi, ka dalë se ngasëse e makinës ka qenë një vajzë 18 vjeçe, e cila pastaj ka pranuar veprën. Asaj i është marrë leja e vozitjes dhe i është ngritr një kallëzim penal në prokurori. 

Por, më interesantja vjen më vonë. Hetimet e mëtejme kanë sjellë policinë para faktit se zjarrvënësi i radarit në fjalë kishte qenë i dashuri i vajzës, moshatar me të. Ai është arrestuar dhe ka pranuar para policisë se i ka vënë zjarrin radarit për të shpëtuar të dashurën nga dënimi i mundshëm. I riu është liruar po atë ditë nga arresti por ndaj tij është ngritur kallëzimi penal për zjarrvënie dhe shkaktim dëmi.