UB shqiptaro-gjermane: Kosova nuk është vend i haraqit

Foto: Veton Osmani

Unioni i Bizneseve shqiptaro-gjermane ka reaguar ndaj konstatimit se “Diaspora nuk investon, Kosova kërkon haraq”, e cila ditëve të fundit, sipas tyre, është publikuar në disa media.

Me anë të një njoftimi ata kanë thënë se “Kosova përkundër disa vështirësive që mund t’i ketë, është një zonë me shumë favore për investitorët e jashtëm, e sidomos për investitorët nga Diaspora”.

Tutje thuhet se diaspora deri tani e ka dëshmuar gatishmërinë për investime në Kosovë dhe një pjesë e madhe e bizneseve ekzistente në Kosovë janë pikërisht biznese të krijuara me kapitalin nga diaspora.

“Anëtarë të Unionit të Bizneseve shqiptaro-gjermane, ndër vite, kanë investuar në Kosovë dhe gatishmëria për investime është në rritje e sipër. Sot në Kosovë anëtarët e Unionit të Bizneseve shqiptaro-gjermane janë pronarë të hidrocentraleve, pronarë të firmave të ndryshme prodhuese, aksionarë të bankave, pronarë të plantazheve të pemëve, pronarë të objekteve të gastronomisë, por edhe pronarë të firmave shërbyese të profileve të ndryshme. Interesimi për investime edhe më të mëdha në Kosovë është arritur edhe falë gatishmërisë së Qeverisë së Republikës së Kosovës për ofrimin e 40 hektarëve me infrastrukturë të përfunduar për ndërtimin e parkut ekonomik të bizneseve nga Diaspora, projekt ky tanimë i nënshkruar për implementim nga Ministria e Tregtisë dhe Industrisë, Ministria e Diasporës dhe Investimeve Strategjike dhe Unionit të Bizneseve shqiptaro-gjermane, thuhet tutje në një postim të Bekim Brestovcit nga Unioni i Bizneseve shqiptaro-gjermane.

Tutje në njoftim thuhet edhe se në vargun e një vlerësimi pozitiv për investime në Kosovë dhe konform gatishmërisë së bizneseve nga Gjermania, në radhë të parë, por edhe nga shtetet e tjera ku jeton diaspora shqiptare, së shpejti do jetë edhe shoqëria e parë aksionare e bizneseve nga Diaspora, e cila me kapital të përbashkët do t’u qaset investimeve në industrinë ushqimore, në blegtori si dhe në turizmin malor.

“Janë këto vetëm disa nga faktet që hedhin poshtë pohimin e lansuar se“ Diaspora nuk investon, ngase Kosova kërkon haraq“. Diaspora asnjëherë si deri më tani nuk ka qenë më e motivuar për të investuar në Kosovë. Këtë e dëshmojnë projektet konkrete të realizuara dhe të iniciuara deri më tani, por edhe pjesëmarrja aktive dhe numerikisht e madhe e bizneseve nga Diaspora në konferencat ekonomike, të cilat një nga prioritetet kanë investimet në vend”, thuhet në fund të njoftimit.