Dënim me kusht për policin që ka vrarë vjedhësin

Sipas trupit gjykues, polici ka reaguar duke qëlluar me armë pasi që ka ka pasur arsye të frikësohet se vjedhësi mund të ketë qenë i armatosur

Ka përfunduar sot procesi gjyqësor ndaj policit nga kantoni Schwyz, të akuzuar për vrasjen e një vjedhësi të paarmatosur nga Moldavia.

Trupi gjyqësor i Gjykatës Penale të Schwyz-it i ka shqiptuar policit një dënim 15 muajsh burg me kusht. Akti i tij i kryer në shtator të vitit 2012 është cilësuar nga gjykata si “veprim i gabuar” nga këndvështrimi i taktikës policore.

Këtë masë dënimi ai e ka marrë për veprën penale vrasje nga pakujdesia dhe lëndim trupor po ashtu nga pakujdesia (pasi që ai ka plagosur edhe vjedhësin tjetër i cili ishte ne ikje me tashmë viktimën). 

Në aktakuzën e bërë nga prokurorja ishte, polici dyshohej për vasje me paramendim dhe lihej mundësia edhe për cilësim të veprës si vrasje nga pakujdesia. Trupi gjyqësor duke shqiptuar dënimin me kusht, ka ndjekur kërkesën e dytë të prokurores, shkruan srf.ch.

Sikur të plotësohej kërkesa e parë (për vrasje me paramendim dhe për lëndim trupor nga pakujdesia), i fajësuari do të dënohej me  pesë vjet e tre muaj burgim.

Dënimi me kusht është arsyetuar nga trupi gjykues me faktin se polici ka reaguar duke qëlluar me armë pasi që ka ka pasur arsye të frikësohet se vjedhësi që ishte në ikje, mund të ketë qenë i armatosur.

Nga ana tjetër, trupi gjykues nuk e ka ndjekur kërkesën e mbrojtjes për pafajësi të policit, pasi që ka konstatuar se ai ka vepruar gabimisht dhe ka mundur të evitonte situatën që ka sjellë te vrasja.